ເຮືອນພັກແຮມຄວນຢູ່ໃກ້ກັບແຫຼ່ງທ່ອງທ່ຽວທາງທໍາມະຊາດ ແລະ ວັດທະນະທໍາ ແລະ ຜູ້ໃຫ້ບໍລິການເຮືອນພັກແຮມຕ້ອງໄດ້ຮັບການຝຶກອົບຮົມກ່ຽວກັບຫຼັກສູດການບໍລິການດ້ານການທ່ອງທ່ຽວ ຫຼື ເຮືອນພັກແຮມ.

ຕົວເຮືອນຈະຕ້ອງຢູ່ໃນສະພາບດີ, ສະທ້ອນເຖິງສະຖາປັດຕະຍະກໍາ ແລະ ຄວາມເປັນເອກະລັກຂອງທ້ອງຖິ່ນ, ມີຫ້ອງນອນ ແລະ ຫ້ອງນໍ້າ ສໍາລັບແຂກ,ໄຟຟ້າ ແລະ ນ້ຳສະອາດຢ່າງພຽງພໍ.

ກິດຈະກໍາພາຍໃນບ້ານ ແລະ ກິດຈະກໍາແບບຊຸມຊົນມີສ່ວນຮ່ວມຕ້ອງເນັ້ນໃຫ້ເຫັນເຖິງຄວາມເປັນເອກະລັກ, ຄຸນຄ່າ ແລະ ວັດທະນະທໍາດັ້ງເດີມຂອງທ້ອງຖິ່ນ ເພື່ອເຮັດໃຫ້ນັກທ່ອງທ່ຽວໄດ້ຮຽນຮູ້ ແລະ ສໍາພັດປະສົບການທີ່ແຕກຕ່າງ ແລະ ເປັນຂອງແທ້ດັ້ງເດີມ.

ການຈັດຕັ້ງເຮືອນພັກແຮມຈະຕ້ອງມີໂຄງຮ່າງການຈັດຕັ້ງຢ່າງເປັນລະບົບ, ກໍານົດພາລະບົດບາດ, ໜ້າທີ່ຮັບຜິດຊອບ ແລະ ຂອດການປະສານງານທີ່ຊັດເຈນ ເຊິ່ງດຳເນີນແບບທຸລະກິດການຄ້າ, ແຕ່ມີຄວາມຮັບຜິດຊອບຕໍ່ສັງຄົມ, ວັດທະນະທຳ ແລະ ສິ່ງແວດລ້ອມ ແລະ ມີການສ້າງຄວາມເຂັ້ມແຂງ ແລະ ຝຶກອົບຮົມ.

ທີ່ຕັ້ງຂອງເຮືອນພັກແຮມຕ້ອງມີເສັ້ນທາງຄົມມະນາຄົມເຂົ້າເຖິງ ແລະ ຕິດຕັ້ງປ້າຍຊີ້ບອກເພື່ອບອກທາງເຂົ້າຫາບ້ານໃຫ້ແກ່ແຂກຢ່າງລະອຽດ.